Елімізде есірткі тасымалы әрекеттері тыйылар емес. Құқық қорғау органдары бір апта ішінде осындай екі бірдей арнаның жолын кесті. Мәселен, Абай облысында 21 жастағы жүргізушіден 2 келіден астам есірткі заты тәркіленді. Күдікті оны интернет-дүкен иесінің нұсқауымен таратқанын мойындаған. Ал елордада интернет арқылы жұмыс істеген 26 жастағы әйел қолға түсті. Тінту кезінде салмағы 1 келіден асатын екі қаптама синтетикалық есірткі мен электронды таразылар, сондай-ақ, 100-ден астам орауға арналған қалташа табылды. Жалпы алғанда, заңсыз айналымнан 45 мыңнан астам бір реттік қолдануға тең есірткі алынды. Қазіргі уақытта сотқа дейінгі тергеп-тексеру амалдары жүргізілуде.
