Қазақстанда халықты медициналық скринингпен қамту деңгейі 25 пайызға артты. Бұл туралы Денсаулық сақтау министрі Ақмарал Әлназарова Үкімет отырысында мәлімдеді. Ведомство басшысының айтуынша, қазіргі уақытта елімізде ауытқуларды ерте анықтайтын скринингтің 6 түрі жолға қойылған. Оның үшеуі тікелей перзентханаларда жүргізіліп, нәрестелердің өміріне араша болуда. Мәселен, аудиологиялық скринингтің арқасында есту қабілетінен толық айырылған 523 балаға құны 6 жарым миллион теңге тұратын заманауи импланттар орнатылды. Ал офтальмоскринингтің нәтижесінде көз патологиясы анықталған 700-ден астам шала туған нәрестенің жанары сақталып қалды. Министрдің сөзінше, денсаулық сақтау саласындағы басты бағыт – инклюзивті ортаны дамыту және медициналық көмекке қол жеткізудегі теңсіздікті жою. Цифрлық құралдар мен жаңа технологияларды енгізу арқылы алдағы уақытта мүгедектік пен өлім-жітім көрсеткішін айтарлықтай төмендету жоспарланып отыр.
.webp)
