Түркістан облысында аса ауыр қылмыстарды ашу көрсеткіші 100 пайызға жетті. Ведомствоаралық комиссия отырысында белгілі болғандай, өңірдегі жалпы қылмыс деңгейі өткен жылмен салыстырғанда 8 пайызға төмендеген. Бүгінде облыста әр 10 мың тұрғынға шаққандағы қылмыс көрсеткіші республикалық деңгейден айтарлықтай төмен. Дегенмен, интернет-алаяқтық дерегінің 40 пайызға артуы — мамандарды алаңдатып отырған басты мәселе. Сонымен қатар, есірткі тасымалымен күрес те күн тәртібінде. Жыл басынан бері бұл бағытта 78 дерек тіркеліп, 7 келіден астам заңсыз зат тәркіленді. Мониторинг нәтижесінде есірткіні жарнамалаған 200-ден астам интернет-ресурс бұғатталды. Облыс әкімі Нұралхан Көшеров құқық қорғау органдарына қоғамдық қауіпсіздікті сақтау мен киберқылмысқа тосқауыл қою бойынша нақты тапсырмалар берді.
