Түркістан облысында Ордабасы ауданындағы «Найман» каналын бетондау жұмыстары толық аяқталды. «Қазсушар» филиалы жүзеге асырған жоба бойынша «Найман» каналының 17,6 , «Қара ой» су жүйесінің 5,8 және R-1 арнасының 1,7 шақырым жері бетонмен қапталды. Жыл соңына дейін олардың бойындағы көпірлер мен су құбырларының құрылысы да аяқталады. Жаңғыртылған гидронысан Ордабасыдағы 2000 гектар суармалы жерді, сондай-ақ аудан орталығы мен Қажымұқан ауылының шаруашылықтарын сумен қамтамасыз етеді. Жоба нәтижесінде бұрын су жетпей келген алқаптар биылдан бастап тіршілік нәрінен тапшылық көрмейді. Сондай-ақ, бетондау жұмыстары су шығынын айтарлықтай азайтпақ .
