Жетісайдағы өрттен аман қалған үш адамның бірінің жағдайы өте ауыр. Денсаулық сақтау саласының өкілдері баланы емдеуге Алматыдан арнайы мамандар тартылғанын, қажетті көмектің барлығы көрсетіліп жатқанын хабарлады. Өрт салдарынан барлығы 12 адам, оның ішінде тоғыз бала қаза тапты. Үшеуі жарақат алып, Шымкентке жеткізілген. Екі ересек адамның жағдайы тұрақты деп бағаланды. Қайғылы оқиға болған екі қабатты үйден өрт сөндіру кезінде ес-түссіз жатқан үш адам шығарылған. Қазір оқиға себептері тексеріліп, апаттан аман қалғандардың жағдайы Денсаулық сақтау министрлігінің бақылауында.
