Көлік құралдарын тіркеудің қылмыстық схемасы жойылды. Алматыда VIN-кодтарды өзгертумен айналысқан жерасты цехының жұмысы әшкереленді. Тіркеуге заңсыз қойылған 150-ден астам автокөлік анықталды. Арнайы топ көлік құралының бірегей кодын өзгертіп, құжаттарды қолдан жасап келген. Қылмыстық іске халыққа қызмет көрсету орталығы қызметкерлерінің де қатысы бары анықталып отыр.Түркістан облысында саудагер насыбай сатумен айналысқан. Мақтааралдық полицейлер пысықай кәсіпкердің сауда орны мен үйіндегі гаражынан 45 келіден астам тиым салынған затты тәркіледі. Орталық базарда сыпырғы сатумен айналысатын тұрғын насыбай өнімін арнайы пластикалық бөтелкелерге салып, сату үшін әзірлеп қойған. Қазір аталған азаматқа қатысты шара көріліп, тәркіленген заттар жойылды.
