Маңғыстау облысында сарбаздар өлімімен аяқталған қайғылы оқиғадан кейін Қорғаныс министрлігінде басталған тексерістің алғашқы нәтижелері белгілі болды. Жаппай аудит қорытындысы бойынша 13 қылмыстық іс қозғалып, қызметтік салғырттығы үшін 5 лауазымды қызметкер қамауға алынды. Комиссия төрағасы Аида Балаеваның есебін тыңдаған Мемлекет басшысы Қасым-Жомарт Тоқаев бұл мәселені жеке бақылауында ұстайтынын және кінәлілердің барлығы заң алдында жауапқа тартылатынын мәлімдеді. Тергеу барысында әскери оқу-жаттығуларды жоспарлау мен қауіпсіздік ережелерін сақтауда өрескел қателіктер жіберілгені анықталды. Бұдан бөлек, мемлекет мүлкін талан-таражға салу, қызметін асыра пайдалану, тіпті казармадағы әлімжеттік фактілері әшкереленді. Енді тексеріс нәтижесі негізінде армияны түбегейлі реформалау жоспары әзірленбек. Қорғаныс саласындағы аудит жұмыстары әлі де жалғасуда.
.webp)
